Ceapadh an Dr Karen Daly ina Ceann ar an Rannóg Taighde Comhshaoil, Ithreacha agus Úsáide Talún (ESLU) in Teagasc, atá lonnaithe i gCaisleán Bhaile Sheáin, Contae Loch Garman.
Bhain an Dr Daly céim BA sa Cheimic amach ó Choláiste na Tríonóide, Baile Átha Cliath. Chuaigh sí ar aghaidh chun Máistreacht sa Cheimic Orgánach Shintéiseach a dhéanamh. Chomh maith leis sin, bhain sí PhD amach in Eolaíocht an Chomhshaoil ó Choláiste na Tríonóide, Baile Átha Cliath, agus le déanaí bhain sí Teastas Iarchéime i gCeannaireacht Straitéiseach amach ó OCBÁC.
Tá taithí os cionn 24 bliain ag an Dr Daly ar thionscadail agus foirne taighde a stiúradh a dhíríonn ar thopaicí amhail sláinte ithreach, fosfar ithreach agus cáilíocht uisce, measúnú riosca ar cháilíocht uisce ar scála abhantraí agus feirme, agus bearta maolaithe ar scála feirme chun cáilíocht an uisce a chosaint. Le déanaí, tá an taighde agus na nuálaíochta i speictreascópacht agus brath neasach le haghaidh samplaí comhshaoil á chur chun cinn aici. Tá sí aitheanta go hidirnáisiúnta as a saineolas agus tá 95 foilseachán eolaíoch piarmheasúnaithe aici agus rinne sí meantóireacht ar 17 mac léinn go dtí céim bronnta Ph.D. Rinneadh a cuid oibre ar ithreacha, fosfar agus cáilíocht uisce a aistriú go comhairle bainistíochta cothaitheach lena gcuirtear bonn eolais faoi bheartas chomh maith le comhairle ar an bhfeirm, agus tá muinín inti as comhairle eolaíoch fhónta a sholáthar maidir le beartas agus cleachtas.
Agus comhghairdeas á thabhairt aige do Karen, dúirt John Spink, Ceann Barr, Comhshaoil agus Úsáide Talún Teagasc; “Tá áthas orm go bhfuil Karen ina cuid den fhoireann bainistíochta agus táim ag tnúth le bheith ag obair léi. Tá fás suntasach tagtha ar an gclár taighde um Chomhshaol, Ithreacha agus Úsáid Talún (ESLU) le blianta beaga anuas le hobair bhreise a bhaineann le gáis cheaptha teasa, cáilíocht an uisce agus bithéagsúlacht. Beidh saineolas agus taithí Karen thar a bheith luachmhar agus í ag bainistiú na foirne móire atá lonnaithe i gCaisleán Bhaile Sheáin anois.”
Dúirt Karen Daly; “Is mór an onóir dom bheith ag obair leis an bhfoireann ardfheidhmíochta anseo i gCaisleán Bhaile Sheáin, agus táim ag tnúth le bheith i gceannas ar an rannóg maidir le réitigh nuálacha a fhorbairt chun tacú leis an earnáil agraibhia.”