Dearadh Clóis Feirme ar mhaithe le Sábháilteacht
Leanann Teagasc le béim láidir a chur ar dhearadh sábháilte clós feirme le linn sheachtain na sábháilteachta ar an bhfeirm (21-25Iúil) (Hashtag: #FarmsSafetyWeek) agus beidh roinnt imeachtaí saor in aisce ar an bhfeirm ar siúl ar fud na tíre.
Forbraítear clóis feirme shábháilte trí machnamh cúramach agus dearadh mionsonraithe. Caithfidh clóis feirme a bheith feidhmiúil d’fhiontair bheostoic agus barr, ach caithfidh siad gluaiseacht shábháilte éifeachtach daoine, beostoic agus innealra feirme a éascú freisin. Caithfear deighilt shoiléir idir daoine, beostoc agus innealra a chur i bhfeidhm ar fud na feirme chun tascanna feirme a bhainistiú go sábháilte. Ní foláir go seachnófar teagmháil le beostoc agus innealra ar bhealaí coisithe.
Deir Tom Fallon, speisialtóir i bhFoirgneamh agus Bonneagair Feirme Theagaisc; “Tá comhairleoirí Theagaisc ar fud na tíre ardoilte chun cuidiú le feirmeoirí éifeachtúlacht agus sábháilteacht a gclós feirme a uasmhéadú. Féachann comhairleoirí Theagaisc le cuidiú le gach feirmeoir aonair cinntí a dhéanamh maidir le forbairt a gclóis feirme sa ghearrthéarma agus san fhadtéarma chun gnáthaimh oibre, éifeachtúlacht oibre agus sábháilteacht a fheabhsú.”
Dúirt Francis Bligh, Speisialtóir Sláinte agus Sábháilteachta ag Teagasc; “Bíonn tionchar dearfach díreach ag saoráidí maithe ar shábháilteacht agus ar bhainistíocht éifeachtach na feirme. Mholfainn go mór d’fheirmeoirí pleanáil a dhéanamh roimh ré agus labhairt lena gcomhairleoirí faoina gcuid smaointe dá gclós feirme, agus iniúchadh a dhéanamh ar fhoinsí maoinithe rialtais féideartha chun cuidiú le costas na n-oibreacha.”
Leis an scéim um Liúntais Chaipitil Luathaithe le haghaidh sábháilteacht feirme, is féidir le feirmeoirí 50% de chostas trealaimh incháilithe a dhíscríobh gach bliain thar dhá bhliain, seachas na hocht mbliana chaighdeánacha. Leathnaíodh an liosta trealaimh incháilithe faoin scéim sin i mbliana chun aonaid láimhseála beostoic sheasta, tuilsoilse, monatóirí beostoic agus doirse sleamhnáin nó rollta a chuimsiú. Maidir le feirmeoirí eallaigh, tá gabhlaigh, rásaí, agus geataí breithe lao incháilithe do na liúntais chaipitil freisin.
Dúirt Francis Bligh, “Comhlánaíonn an scéim um liúntais chaipitil luathaithe an cúnamh deontais 60% atá ar fáil faoi Scéimeanna Nuachóirithe Talmhaíochta Spriocdhírithe (TAMS 3) na Roinne Talmhaíochta, Bia agus Mara (RTBM) le haghaidh infheistíochtaí a bhaineann le sábháilteacht.” Mholfainn do gach feirmeoir measúnú a dhéanamh ar na deiseanna faoin scéim”.
Leideanna ginearálta maidir le dearadh sábháilte clós feirme.
Measúnú Riosca
Beidh measúnú riosca rialta ina chuidiú maidir le réimsí agus gníomhaíochtaí ardriosca féideartha a shainaithint. Is féidir obair a dhéanamh ansin chun fáil réidh leis na rioscaí sin nó iad a laghdú. Cuideoidh cumarsáid mhaith i measc na ndaoine uile a oibríonn ar an bhfeirm le comhráite oscailte a spreagadh faoi rioscaí lena chinntiú go saineofar agus go réiteofar iad.
Deighil Gníomhaíochtaí Tí agus Oibre
Is féidir an clós feirme a bheith gar do theaghlach na feirme. Tá sé tábhachtach go mbeadh deighilt shoiléir idir gníomhaíochtaí tí agus oibre. Caithfidh limistéar súgartha sábháilte ainmnithe do leanaí a bheith in áit ar shiúl ó innealra, beostoc agus guaiseacha amhail umair sloda agus ceimiceáin feirme.
Limistéir oibre atá sainithe go soiléir,
Ba chóir an clós feirme a dhearadh ionas go gcoinneofar gníomhaíochtaí scartha i suíomhanna sainithe a bhainistítear go maith.
Seo roinnt samplaí de sin
- ceimiceáin feirme agus trealamh spraeála barr i limistéar sainithe ina bhfuil saoráidí stórála agus níocháin,
- ba chóir go mbeadh spás i gceardlann/limistéar cothabhála meaisíní chun uirlisí agus páirteanna a stóráil go néata,
- Ba chóir olaí agus bealaí feirme a choinneáil le chéile in umair stórála ainmnithe,
- ba chóir innealra a stóráil ar dhromchla crua atá clúdaithe go hidéalach ar shiúl ó ainmhithe agus ó bharra,
- ba chóir tithíocht beostoic agus trealamh láimhseála a choinneáil le chéile agus ba chóir dóibh a bheith oiriúnach don chineál beostoic agus coinnithe ar shiúl ó bharra agus innealra.
Solas maith
Ní mór solas maith a bheith i bhfoirgnimh agus clóis feirme. Ní mór do leictreoir cáilithe measúnú a dhéanamh ar chiorcaid leictreacha go rialta.
Dálaí glana soladacha talún
Maidir leis na dálaí talún, ní mór a chinntiú go seachnófar sleamhnú, tuislí agus titim. Ba chóir go mbeadh dromchlaí crua saor ó uisce agus láib ar chlóis. Ní mór iad a ghlanadh go rialta. Ba chóir fánaí géara a sheachaint.
Comharthaí rabhaidh
Ní mór comharthaí rabhaidh a chur ag bealach isteach na feirme chun aird a tharraingt ar limistéir ardriosca. Ní mór comharthaíocht shoiléir a bheith ag limistéir ghuaiseacha laistigh den fheirm freisin. I measc roinnt samplaí tá cró tarbh, limistéar breithe lao, stóras ceimiceán, limistéar ceardlainne, cáblaí leictreacha agus umair sloda.
Bosca garchabhrach
Coinnigh bosca garchabhrach a bhfuil stoc iomlán ann in áit atá inrochtana go héasca sa chlós feirme. Bí cinnte go bhfuil sé le feiceáil agus go bhfuil a fhios ag gach duine ar an bhfeirm cá bhfuil sé.
An Comhshaol
Cuidíonn foirgnimh agus clóis feirme mhaithe lena chinntiú go bhfuil cothaithigh chostasacha á mbailiú go cúramach agus á mbainistiú ar an mbealach is fearr agus is féidir. Bíonn tionchar dearfach aige sin ar shuaimhneas intinne an fheirmeora toisc go gcuidíonn sé le hábhair imní a bhaineann le comhlíonadh reachtaíochta a bhaineann leis an gcomhshaol a laghdú.
Tógáil Feirme
Tá obair thógála feirme cumhdaithe faoi na Rialacháin maidir le Sábháilteacht, Sláinte agus Leas ag an Obair Tógáil). Ní mór d’fheirmeoir Coinní Tógála a dhéanamh sula dtosaíonn sé ar obair thógála. Tá treoir maidir le coinní a dhéanamh ar fáil ag: