Leagann Príomhshocheolaí Tuaithe Treoirphlean Amach chun Talmhaíocht an Aontais a Dhéanamh Níos Tarraingtí
Chuir an tOllamh Frank Vanclay ó Ollscoil Groningen prionsabail i láthair a bhaineann le cur chun feidhme Fhís uaillmhianach an Choimisiúin Eorpaigh do Thalmhaíocht an Aontais ag Campas Mellows Teagasc Déardaoin an 29 Bealtaine, ina gcuirtear treoir phraiticiúil maidir le feirmeoireacht a dhéanamh níos tarraingtí ar fáil.
Ag labhairt dó trí seachtaine díreach i ndiaidh don Choimisiún Eorpach a Fhís maidir le “Earnáil feirmeoireachta agus agraibhia tharraingteach a mhúnlú do ghlúin amach anseo” a sheoladh, leag an tOllamh Vanclay prionsabail shóisialta fianaise-bhunaithe amach lena bhféadfaí athrú ó bhonn a dhéanamh ar an dóigh a n-oibríonn beartas talmhaíochta agus seirbhísí comhairleacha talmhaíochta ar fud na hEorpa.
Ceithre Phríomhphrionsabal le haghaidh Athrú ó Bhonn ar an Talmhaíocht
- Feirmeoireacht a Dhéanamh Tarraingteach Thar an nGeilleagar: Chuir an tOllamh Vanclay i dtábhacht go gcaithfear aghaidh a thabhairt ar ghnéithe mothúchánacha, cultúrtha agus féiniúlachta na feirmeoireachta, agus ní ar dhreasachtaí eacnamaíocha amháin, chun daoine óga a mhealladh chuig an talmhaíocht. “Ciallaíonn inbhuanaitheacht fanacht ar an bhfeirm”, a mhínigh sé, agus béim á leagan aige ar conas nach mór aird a thabhairt i mbeartas ar mhian mhór na bhfeirmeoirí a gcuid oibre a fhágáil le hoidhreacht dá gclann, ag cinntiú ag an am céanna go meallfaidh an fheirmeoireacht grúpaí éagsúla lena n-áirítear banfheirmeoirí agus oibrithe feirme neamhthraidisiúnta.
- Aghaidh a thabhairt ar Mhíbhuntáistí Struchtúracha: Cheistigh an cur i láthair toimhdí coitianta faoi fheirmeoirí atá ag streachailt. “Tá feirmeoirí imeallacha struchtúrtha le bheith imeallach mar gheall ar bheartais stairiúla agus fórsaí eacnamaíocha domhanda, ní mar gheall ar dhroch-roghanna aonair”, a dúirt an tOllamh Vanclay. Mhol sé tacaíocht dhifreáilte a bheadh oiriúnaithe do stíleanna feirmeoireachta agus do chomhthéacsanna áitiúla ar leith seachas cur chuige oireann do chách.
- Córais Nuálaíochta faoi stiúir Feirmeoirí: Chuir an tOllamh Vanclay béim air gur turgnamhaithe nádúrtha iad feirmeoirí a chuireann a gcuid eolais féin le chéile. Le beartas nuálaíochta rathúil, ba chóir go ndéanfaí réitigh a chomhchruthú le feirmeoirí, seachas teicneolaíocht a aistriú amháin, ag urramú eolas áitiúil agus comhoiriúnacht le cineálacha éagsúla cur chuige feirmeoireachta á cinntiú. Tá sé sin thar a bheith ábhartha maidir le rath scéimeanna éiceolaíochta CBT.
- Cur Chun Feidhme Beartais a Shimpliú: Le cláir chasta dholúbtha, laghdaítear muinín agus rannpháirtíocht feirmeoirí, a chomhairligh an tOllamh Vanclay. D’iarr sé cláir níos simplí atá íogair ó thaobh comhthéacs de, arna gcomhdearadh le feirmeoirí chun dlisteanacht agus éifeachtacht araon a fheabhsú.
Impleachtaí Beartais
Tá tráthúlacht chur i láthair an Ollaimh Vanclay thar a bheith suntasach agus ballstáit an Aontais ag cur tús le Fís an Choimisiúin a chur chun feidhme. Lena chreat, cuirtear treoir nithiúil ar fáil maidir le bearta CBT, seirbhísí comhairleacha talmhaíochta agus cláir nuálaíochta a dhearadh lena bhféadfaí treocht an mheathlaithe talmhaíochta agus dícheangal na hóige ón bhfeirmeoireacht a chasadh thart i ndáiríre.
Dúirt an Dr Áine Macken-Walsh, socheolaí Teagasc agus cathaoirleach an tseimineáir; “Cé go leagtar amach san Fhís an chuma ba chóir a bheith ar thalmhaíocht an Aontais amach anseo, cuireann an tOllamh Vanclay treoir chumhachtach ar fáil maidir le conas é sin a bhaint amach trí oibriú le luachanna, féiniúlachtaí agus réaltacht saoil feirmeoirí.”
Leag Aidan Murray, Ceann an Aonaid Tacaíochta Scéimeanna in Teagasc, béim ar an tábhacht a bhaineann le scéimeanna sna céimeanna luathfhorbartha, sula ‘dtagann siad i bhfeidhm’. “Tá dearadh scéimeanna, agus tuairimí an oiread daoine agus is féidir a fháil ríthábhachtach chun go n-éireoidh leis na scéimeanna sin ar deireadh agus d’éifeachtacht na scéimeanna sin, ag baint leas as taithí comhairleoirí agus na bhfeirmeoirí féin”, a dúirt speisialtóir Teagasc.
Thug Paul Maher, an Ceann Caidrimh Idirnáisiúnta agus Straitéise Corparáidí in Teagasc, comhthéacs idirnáisiúnta an domhain i mbéal forbartha i leith an phlé. Dúirt sé; “léirítear leis an dúshlán leanúnach a bhaineann le leathnú na talmhaíochta a fhorbairt ar fud an domhain an tábhacht leanúnach a bhaineann le prionsabail Vanclay, agus chun iad a chuimsiú i gcórais chomhairle éagsúla lena mbaineann sásraí maoinithe éagsúla, teastaíonn cur chuige atá sainiúil don chás ”.
Chuir an Dr David Meredith, Ceann Rannóg Gnó Agraibhia agus Anailíse Spásúla Teagasc, fáilte roimh chur i láthair an Ollaimh Vanclay agus chuir sé i dtábhacht gurb ionann a chur i láthair agus deireadh le sraith sé chuid ina raibh taighde idirnáisiúnta agus Éireannach. “Léirítear leis an tsraith an tábhacht a bhaineann le comhoibriú agus malartú eolais idir comhairleoirí, taighdeoirí agus lucht déanta beartas, rud atá ríthábhachtach maidir leis an dóigh a mbíonn Teagasc ag caidreamh le feirmeoirí agus a neartaíonn a thiomantas do chur chuige fianaise-bunaithe atá dírithe ar fheirmeoirí”, a dúirt an Dr Meredith.