Tá Straitéis Chomhairleach nua Teagasc á píolótú i dhá cheann dá réigiúin chomhairleacha ó Eanáir na bliana seo. Dúirt Ceann chlár comhairleach Teagasc, Tom Curran; “Tar éis athbhreithniú suntasach a dhéanamh ar an gcaoi a gcuirimid tacaíochtaí comhairleacha ar fáil dár gcliaint feirmeoirí, tá straitéis nua forbartha againn a chreidimid a chuirfidh ar ár gcumas seirbhís níos fearr a chur ar fáil d’fheirmeoirí.”

Dúirt sé; “Tá méid agus castacht na scéimeanna tar éis éilimh a mhéadú go mór ar fheirmeoirí agus ar chomhairleoirí araon le blianta beaga anuas. Tá ár bhfoireann tar éis obair go dian chun coinneáil suas leis an ualach oibre seo agus de réir a chéile laghdaigh sé seo an t-am atá acu do chomhairle theicniúil ar an bhfeirm a thabhairt. Tá fonn orainn aghaidh a thabhairt ar an aiseolas láidir ó chliaint ina leagtar béim ar an ngá agus ar na tairbhí a bhaineann le bheith in ann seirbhís tacaíochta theicniúil agus chomhairleach gnó feirme ar ardchaighdeán a choinneáil agus a neartú do chliaint agus do na hearnálacha feirmeoireachta níos leithne.”

Chun dul i ngleic leis an dúshlán a bhaineann le freastal ar scéimeanna agus ar riachtanais theicniúla ár gcliant, tá Aonad Tacaíochta Scéimeanna náisiúnta nua bunaithe ag Teagasc. Tá an t-aonad nua seo á stiúradh ag Aidan Murray. Is é feidhm an aonaid seo ná feabhas a chur ar na tacaíochtaí do chomhairleoirí maidir le soláthar seirbhísí scéimeanna agus tacú le comhairleoirí sa líne tosaigh leanúint den tseirbhís seo a sholáthar do chliaint

Beidh Teagasc ag sannadh roinnt comhairleoirí chun díriú agus speisialtóireacht a dhéanamh ar thacaíocht a thabhairt do sheirbhísí scéime le cliaint, rud a ligfidh do ghrúpa comhairleoirí a bheith in acmhainn díriú ar fhorbairt theicniúil agus gnó feirme. Is forbairt thábhachtach é seo chun deis a thabhairt do chomhairleoirí a bheith níos speisialaithe maidir le castacht agus méid na hoibre scéime atá ag dul i méid i rith an ama, agus ag an am céanna am na gcomhairleoirí eile a chosaint chun speisialtóireacht a dhéanamh agus díriú ar chomhairle theicniúil d’fheirmeoirí.

Tá an Straitéis Chomhairleach nua á píolótú i réigiún comhairleach Theagasc Chill Mhantáin, Cheatharlach, Loch Garman agus i réigiún comhairleach Dhún na nGall, Shligigh, Liatroma Tá litreacha á bpostáil chuig cliaint Teagasc ina leagtar amach na hathruithe sa straitéis nua agus a gcomhairleoir ainmnithe. Is beag tionchar a bheidh aige ar chliaint feirmeoirí toisc go leanfaidh cliaint de phríomhphointe teagmhála a choinneáil le Teagasc trí chomhairleoir ainmnithe. D’fhéadfadh an difríocht do chliaint teacht chun cinn i gcásanna áirithe ina ndéantar an cliant a atreorú chuig comhairleoir eile le haghaidh cúraimí speisialaithe timpeall na scéimeanna. Ó thaobh an chliaint de, tá sé seo cosúil leis an gcaoi ar soláthraíodh cuid den obair le scéimeanna agus le maolaithe níotráití roimhe seo.

Comhairleoirí Fiontraíochta

Leithdháilfear Comhairleoir Fiontair ar chliaint ar mian leo leanúint d’fheabhas a chur ar fheidhmíocht theicniúil, éifeachtúlacht, táirgiúlacht agus a ngnó feirme a fhás. As seo amach sa dá réigiún phíolótacha, beidh príomhphointe teagmhála ag na cliaint seo mar Chomhairleoir Fiontair, a dhíreoidh go príomha ar chomhairle theicniúil, ar tháirgeadh agus ar riachtanais bhainistíochta feirme. Beidh grúpaí plé á n-éascú go príomha ag na Comhairleoirí Fiontraíochta seo freisin. Oibreoidh Comhairleoirí Scéime Speisialaithe go dlúth in éineacht le Comhairleoirí Fiontraíochta chun scéimeanna a sholáthar agus tacaíocht rialachán do na cliaint seo.

Comhairleoirí Feirme

Leanfaidh Comhairleoirí Feirme de thacaíocht a thabhairt d’fheirmeoirí a bhíonn ag brath ar scéimeanna le haghaidh cuid shuntasach dá n-ioncam feirme sa bhreis ar an tseirbhís theicniúil a theastaíonn uathu. Leanfaidh Comhairleoirí Feirme de bheith ina bpríomhphointe teagmhála do na cliaint sin, agus leanfaidh siad de bheith ag freastal ar chliaint go díreach ar scéimeanna agus ar chomhairle theicniúil ghaolmhar – ar an gcaoi chéanna leis an gcaoi a n-oibríonn go leor comhairleoirí agus cliant le chéile cheana féin. Trí ghrúpa Comhairleoirí Feirme a choinneáil, cuirtear béim láidir ar a chinntiú go mbainfear an leas is fearr is féidir as tairbhí na scéime agus go dtacófar ag an am céanna le feabhsuithe leanúnacha maidir le éifeachtúlacht agus tháirgiúlacht ar fheirmeacha.

Dúirt Tom Curran; “Is treo nua spreagúil é seo dár gcliaint agus dár bhfoireann agus táim muiníneach go mbeidh an tseirbhís nua seo an-dearfach dár gcliaint. Is céim mhór chun tosaigh Í an fhorbairt nua spreagúil seo do thodhchaí fadtéarmach an Chláir Chomhairligh chun a chinntiú go leanfaidh an tseirbhís ag tacú le forbairt fhadtéarmach na talmhaíochta agus gnólachtaí feirme inbhuanaithe amach anseo Cuid thábhachtach de bhainistiú an athraithe sin ar fud an chláir Chomhairligh is ea é a chur chun feidhme ar dtús in dhá réigiún phíolótacha chun a chinntiú go gcuirfear na hathruithe sin chun feidhme ar bhealach a uasmhéadóidh na tairbhí do chliaint.”